Қазақстан 2026 жылы Астанада өтетін Аймақтық экологиялық саммитке дайындалып жатыр
БҰҰ Қоршаған орта бағдарламасының басшысы Қазақстанның тұрақты даму және қоршаған орта саласындағы бастамаларын жоғары бағалайды, деп хабарлайды DKNews.kz.
БҰҰ-ның Қоршаған орта жөніндегі штаб-пәтерінде Қазақстанның Кениядағы елшісі мен Қазақстан Республикасының Найробидегі БҰҰ кеңсесіндегі тұрақты өкілі Барлыбай Садықов пен БҰҰ Бас хатшысының орынбасары және БҰҰ Қоршаған орта жөніндегі бағдарламасының (ЮНЕП) атқарушы директоры Ингер Андерсен арасында кездесу өтті.
Кездесу барысында елші әріптесіне қоршаған ортаны қорғау және климаттың өзгеруінің салдарын жою үшін Қазақстанның ұлттық, аймақтық және халықаралық деңгейлерде қабылдап жатқан шаралары туралы ақпарат берді. «Таза Қазақстан» бастамасы, Қазақстандағы биоәртүрлілікті сақтау шаралары, Каспий және Арал теңіздері, су ресурстары мәселелерін шешу, сондай-ақ «Бір су көзқарасы» сияқты халықаралық форумдар мен бастамаларға қатысу егжей-тегжейлі талқыланды. Қоршаған ортаны қорғау және климаттың өзгеруінің салдарын жою Қазақстанның ішкі және сыртқы саясатындағы басымдықтардың бірі болып табылатыны және Астананың теңгерімді шешімдер табу және тиімді экологиялық шараларды жүзеге асыру үшін БҰҰ-ны қоса алғанда, халықаралық серіктестермен әрқашан белсенді түрде байланысатыны атап өтілді.
Тараптар Қазақстанның ЮНЕП-пен өзара іс-қимылының ағымдағы мәселелерін, қоршаған ортаны қорғау саласындағы ынтымақтастықты дамыту жоспарларын және Қазақстан делегациясының ЮНЕП іс-шараларына қатысуын талқылады.
Ерекше назар 2026 жылы Астанада Қазақстан Республикасының Президенті Қасым-Жомарт Тоқаевтың бастамасымен өтетін Аймақтық экологиялық саммитті (АЭС) дайындау және өткізу бойынша ЮНЕП-пен ынтымақтастықты талқылауға аударылды. Саммитке дайындық бойынша тығыз ынтымақтастық туралы, соның ішінде Аймақтық экологиялық кеңес барысында қабылданатын бірқатар құжаттар жобалары мен аймақтық бастамаларды әзірлеу туралы келісімге қол жеткізілді.
Сонымен қатар, қатысушылар 2025 жылдың желтоқсанында Найробиде өтетін БҰҰ Қоршаған орта Ассамблеясының 7-ші сессиясына қазақстандық делегацияның қатысуын және Ассамблея кезінде «Су, климат және қоршаған ортаның тұрақтылығы» тақырыбындағы Қазақстанның іс-шарасын өткізуді талқылады.
И. Андерсен Қазақстанның қоршаған ортаны қорғау мәселелерін шешуге бағытталған күш-жігері мен бастамаларын жоғары бағалады, Қазақстанның ЮНЕП қызметін қолдағаны үшін алғыс білдірді және ЮНЕП экология және тұрақты даму саласындағы Қазақстанның бастамалары мен жобаларын жүзеге асыруда сараптамалық көмек көрсетуге дайын екеніне сендірді. Ол Қазақстанның тұрақты даму мәселелерін ілгерілетудегі көшбасшылығын және Орталық Азия мен Ауғанстанға арналған БҰҰ Тұрақты даму орталығының ашылуын, сондай-ақ биологиялық әртүрлілікті, соның ішінде киіктер популяциясын сақтау шараларын ерекше атап өтті.
Кездесу қорытындысы бойынша қоршаған орта саласындағы өзара қызығушылық тудыратын мәселелер бойынша ынтымақтастықты жалғастыру, қоршаған ортаны қорғау жобаларын жүзеге асыруды қолдау және әртүрлі деңгейдегі іс-шараларды өткізу туралы келісімге қол жеткізілді және Қазақстанның БҰҰ Қоршаған ортаны қорғау бағдарламасымен ынтымақтастығын кеңейту бойынша одан әрі бірлескен шараларды қарастыруға дайын екендік білдірілді.